Si Pia, ang Inay at si Utol

Galing kanina sa pedia ang mag-ina ko. Nasa Pangasinan pa din sila. Wala naman daw primary complex si Pia. Natuwa ako syempre. Medyo tumataba na sya ng konti kaya lang talagang mababa pa rin timbang nya. Ang mamahal daw ng gamot na niresta ng pedia, sabi ni misis. Haayyy...

Mahirap pala talaga magpalaki ng anak. Isa pa lang ang anak ko at hindi pa nag-aaral kinakapos na din ako sa budget. Lalo na siguro kapag nag-aaral na sya. Sabagay, baka naman bago sya mag-aral ay nasa Canada na kami. Sana. Pinag-iipunan ko na kasi yung pambayad sa embassy para sa processing fee.

Lalo tuloy akong humahanga sa aking Inay. Namatay ang Tatay ko 9 na taong gulang pa lang ako, ang Ate ko ay 12 at yung bunso naming si Michael ay 5. Lahat kami ngayon ay nakapagtapos na sa kolehiyo at may mga asawa (tig-i-isa lang) na rin. Kakakasal lang ng bunso namin at nakatakdang sumakay ng barko ngayong Hunyo. Yun ay kung maayos ang medical nya. Sana. Biglaan ang kasal (civil) nya at ang gf nya kasi hindi sila maingat sa paggamit ng kanilang mga aparato. Hindi kasi nagtatanong sa akin eh. hehe!