At nagwagi ang mapagsamantala

Sinadya kong hindi muna mag-blog hinggil sa isyu ng impeachment laban kay Chief Justice Hilario Davide Jr. Una dahil mas gusto kong obserbahan muna ang laro ng mga elitista, kung paano sila magbangyan na parang mga asong ulol na nag-aagawan sa kapirasong buto.

Mataas ang paghanga ko kay Chief Justice Hilario Davide Jr. Pinatingkad ito noong panahon ng paglilitis kay Erap sa Impeachment Court. Di man lang siya makitaan ng bahid ng pagkiling sa paghawak nya sa kaso. Kahanga-hanga. Pero hindi ito nangangahulugan na walang kwenta ang reklamo hinggil sa katiwalian sa paggamit ng Judicial Development Fund. Dapat pa rin itong imbestigahan. Pero hindi ito dapat gawing sangkalan ng mapagsamantalang persona upang igiit ang kani-kanilang makasariling interes. Bagong panganak na sanggol lamang siguro ang di mag-iisip na pakana ito ng alyansang Danding at GMA. At gaya ng inaasahan sa mga mapagbalatkayong lider tulad ni GMA, agad-agad ay sumoporta ito kay Davide matapos magpahayag si Cory at Cardinal Sin ng suporta sa Chief Justice. Animo'y si Hudas na humalik kay Kristo ang tagpong aking nakita sa Harap ng korte suprema ng dumating si GMA at magpahayag ng suporta kay Davide! grrrr...

At sa mga pangyayaring ito, lumutang din ang pagiging oportunista ni House Speaker Jose De Venecia. Parang hilong talilong na din maintindihan kung saan papaling ang ulo lalo na ng manganib na siya ay patalsikin sa pwesto nya. Pero sa huli, ay nagmukha pa rin syang bayani. Basahin ang editorial ng Inquirer ngayong araw na ito..

Ewan ko. Pero noon pa man ay wala na ako tiwala kay De Venecia. Pansinin nyo kung paano sya magsalita, kung papaano nya ikumpas ang kanyang mga kamay. Hindi ko talaga sya makakitaan ng sinseridad. Mabuti pa si Mickey Mouse, alam mo kung kelan nagpapatawa at kung kelan malungkot. Wala na yatang hihigit kay De Venecia bilang simbolo ng isang Trapo.